"الإخوان هيمسكوا الحكم لو قامت انتخابات برلمانية " الكلمة الغبية اللى بقت لبانة فى أفواه بعض اللى المفروض إنهم مثقفين


وبعدين يعنى ؟ عايزين ايه ان شاء الله ؟؟؟؟؟؟؟؟؟؟؟

ما هو فى حلين يا إما بلاش إنتخابات يا إما بلاش إخوان

بصوا يا جماعة ربنا يهدينا كده ونعرف نفكر بعقلنا
إحنا قدامنا ثورة لم تكتمل بعد وقدامنا 600 حاجة وحاجة لسه عاوزين نعملها مش علشان البلد تنهض لأ دى علشان تطلع بس من المستنقع اللى وقعت فيه بقالها عقود طويلة منجيش نسيب كل ده ونتكلم فى هيافات وكلام مالهوش لازمة خاصة بعد إعلان الإخوان إنهم لن يدخلوا المجلس بأغلبية فضلا عن أن يفوزو بهذه الأغلبية

والكلام على إن الأحزاب كانت مقهورة ومظلومة من النظام
 أيوه صح أنا نسيت أصل الإخوان كانوا قاعدين فى قصور وفيلات وعمرهم لا شافوا شكل إعتقال ولا تعذيب ولا إضطهاد والا إقصاء وكان النظم شايلهم جوه عينيه


يا ريت بقى نشتغل شغل محترم زى كل الناس اللى عرفت تتقدم ببلادها وكل حزب يشتغل فى الشارع بالقدر اللى هو عاوز يحقه من نجاحات ومش كل واحد يموت له فرخة فى البلد دى يقولك الإخوان

يا ريت نحاول نفهم إن إحنا لم نضحى بمئات الشهداء وألاف الجرحى علشان فى الآخر نعود لنفس المنهج الإقصائى الغريب الذى كان يتبعه النظام السابق
حزب العدالة والحرية سيتم الموافقة عليه وسيسمح له هو وغيره من الأحزاب بالعمل فى الشارع وبعد كده كل واحد وشطارته
يعنى فوز أى حزب فى الانتخابات سيتوقف على مدى جديته فى العمل ومدى مصداقيته فى الشارع ولن يقبل الشارع بعد ذلك أن يقوم أى طرف أيا كان بتعليق أخطائه على شماعة الآخرين