رايحين على فين ؟

دلوقتى فى كام سيناريو مطروح للفترة الجاية ولازم يتم التوافق على أحدهم بشكل سريع

1- السيناريو اللى عرضه المستشار طارق البشرى إنه يتم الموافقة على التعديلات الحالية وبعد كده يتم انتخاب مجلس شعب وبعد كده المجلس يختار هيئة تأسيسة تعمل الدستور وبعد ما نخلص الدستور خالص ويتم الإستفتاء عليه نعمل إنتخابات رئاسية لأن من المتفق عليه من الجميع إن مش هينفع تتم إنتخابات رئاسية بالصلاحيات اللى موجودة فى الدستور وهو سيناريو واقعى وممكن
بس فى كتير معترضين عليه وقالو إن مينفعش تتم انتخابات مجلس الشعب دلوقتى لإنها لن تمثل الشعب تمثيل حقيقى ونستنى شوية لحد ما الأحزاب الجديدة ترتب نفسها وممكن تكون وجهة نظر صحيحة بس أعتقد إن هو ده الحل اللى يحتوى على أقل قدر من الخسائر

2- السيناريو التانى إنه يتم تعيين مجلس رئاسى حتى تستقر الأوضاع بعدها يتم إنتخاب لجنة تأسيسية للدستور من قبل الشعب وبعد كده تتم الإنتخابات البرلمانية والرئاسية
بس الفكرة دى ممكن تواجهها صعوبات أهمها فكرة انتخاب لجنة تأسيسية من قبل الشعب .. الفكرة دى مش واضحة وتطبيقها على الأرض مبهم يعنى أنا هروح أنتخب اللجنة دى إزاى وكمان عليها إعتراض بأن الفترة الانتقالية كده هتطول قوى وده خطيرجدا

3- فى أفكار تانية بإنه يتم تأجيل الاستفتاء شوية لحد ما نعمل تعديل جزئى يتناول صلاحيات الرئيس وبعد كده نبقى نعمل الانتخابات بس كلها حلول مش مكتملة
وفى أفكار كتير مطروحة غير دى

بس المتفق عليه الى الآن إنه لا تتم انتخابات رئاسية فى ظل الدستور الموجود ولو بعد التعديلات لأنها تتيح صلاحيات غير عادية للرئيس

هل عند حد فيكم تصورات تانية أو سمع من حد سياسى تصور مقبول ممكن نفكر فيه .. وإيه رأيكم فى السيناريوهات المطروحة دلوقتى ؟